Af Hlíðarvatnsveiðum

02.05.2012 13:23

1.maí

Fallegt er við Hlíðarvatn. Mynd: Tómas Sigurðsson.

Frekar var rólegt yfir veiðinni fyrsta veiðidaginn í Hlíðarvatni þetta vorið, sennilega hafa um 10-15 bleikjur komið á land hjá öllum félögum.

Eins og flestir vita þá er veðurfar töluverður áhrifavaldur á veiði í Hlíðarvatni, oft getur verið ansi vindasamt og því erfitt að brúka stangir.

Að sögn kunnugra þá er norðanátt með sól vænlegasta veðrið til veiða.

Vonandi verða menn heppnir með veðrið næstu daga þá ætti vatnið að lifna verulega við.

Skrifað af Ritstjóri

28.04.2012 20:30

Hlíðarvarvatn

Kvöldstemming við Hlíðarvatn. Mynd: Tómas Sigurðsson.

Þá er komið að því viðra prikið aftur eftir smá hvíld.

Nú er stefnan tekin á Hlíðarvatn í Selvogi þann 1.maí og verður fróðlegt að sjá hvernig vatnið kemur undan vetri.

Eins og flestir vita hefur verið frekar rólegt yfir vorveiðinni á flestum stöðum þetta vorið og því bindum við nokkrar vonir við að Hlíðarvatnið bregðist ekki.

Skrifað af Ritstjóri

13.04.2012 19:00

Tveir,,,,,,

Heldur hefur verið rólegt yfir veiði í Soginu þetta vorið.

Aðeins var búið að skrá tvo fiska í Bíldsfelli þegar við mættum í hús í fyrrakvöld. Þrátt fyrir að hafa barið með hinum ýmsu flugum í 6 tíma þá náðum við ekki að laga bókhaldið.

Þetta er ótrúlegur munur á milli ára því að í fyrra voru menn með löndunarkvíða fram eftir vori.

En svona er bara þessi veiði, aldrei á vísan að róa.

Skrifað af Ritstjóri

11.04.2012 12:12

Selur sökudólgurinn ?

Selur að sporðrenna laxi.

Það hefur ekki farið fram hjá fólki að heldur rólegt hefur verið yfir veiði í Soginu þetta vorið.

Ólíkt því sem var í gangi í fyrra, þá var mokstur fram eftir öllum apríl.

Hverju er um að kenna ? Sumir vilja meina að selurinn sé að grassera á svæðinu frá áramótum með þessum afleiðingum.

Ritstjórinn hefur reyndar fengið það staðfest að selur hafi verið skotinn á svæðinu í febrúar, mun sá ekki hafa verið lengi í veislunni.

Hvað um það þá er Bíldsfellið og Ásgarður mjög vel seld þetta vorið og er um að gera fyrir veiðimenn að gefast ekki upp.

Ritstjórinn ætlar að skreppa í Bíldsfellið á morgun og reyna að kroppa eitthvað á land. Meira af því síðar.

Skrifað af Ritstjóri

04.04.2012 10:32

Varmá og Ásgarður

Sjötugur Síðutogarinn með hann ! Mynd: Stefán Kristjánsson.

Þá er fyrsta veiðitúr sumarsins lokið, eins og komið hefur fram þá áttum við opnunina í Varmá og svo tvo daga í Ásgarði.

Það var ekki laust við að sumir gerðu sér vonir um góð aflabrög í ljósi góðrar veiði undanfarina ára í opnun.

En því miður stóð þessi dagur ekki undir væntingum nema jú að veðrið var magnað og félagsskapurinn enn betri.

Hverju er þessari ördeyðu um að kenna ? Það voru kenningar á lofti um að það hefði vorað það snemma að megnið að fiskinum væri farinn niður úr öllu.

Enda veiddust nokkrir á neðsta svæðinu.

Sumir vildu meina að ástæðan fyrir fiskleysinu væri sú að SAXI skartaði þessu líka forljóta yfirvaraskeggi og hefði með þessu framferði gert alla von um góða veiði að engu :)

Af Ásgarðsveiðum er það að frétta að við hrepptum hið versta vetrarveður og gátum því lítið stundað veiðar.

Ætli við höfum ekki verið við veiðar í um 6 tíma á þessum tveimur dögum.

En veiðin var bara nokkuð góð miðað við aðstæður, alls komu 7 fiskar á land, 4 birtingar og 3 bleikjur sem öllum var sleppt.

Næsti túr mun vera í Bíldsfellið í næstu viku og vonandi fær maður þokkalegt veður.

Myndir eru komnar á albúm.

Skrifað af Ritstjóri